Red Cross Society | Kashmiri | Class 8th | Lesson 9 | Questions and Answers

گۅڈنِکۍ لٹہِ میانہِ یتھ ویب سایٹہِ پٮ۪ٹھ ٲٹھمہِ جمٲژ ہٕنٛزِ  کٲشِر کِتاب ہٕنٛزِ سوالن ہٕندۍ جواب لیکھنہٕ آمٕتۍ ۔ وومید چھیم زِ توٚہہِ ییِہ پسنٛد۔ پنٕنۍ راے لیکٖھ زیو کمینٹس مٔنٛز  ۔  شُکریہ۔

مشق:

1۔ لفٕظ تہٕ مانہِ

لفٕظ                                            معنی

رضا کار         :           معاوضہٕ ورٲے پننہِ مرضی پٮ۪ٹھ کٲم کرن وول

ووکھٕ                :          وُلٹہٕ

تٲجِر            :        تِجارت کرن وول

راحت     :           آرام

بجٲیی          :            آباد کرُن

2۔ جواب لیِکِھو

س1:۔   اِٹلی تہٕ آسٹریاہس درمیان یُس جنگ سپُد سُہ وُچھتھ کیازِ  گو ہینری ڈونانٹ دۅکھٕ زد؟

جواب:۔   ہینری ڈونانٹ گو اِٹلی تہٕ آسٹریاہس درمیان جنگس منٛز مارٕ گٲ مٕتۍ لاشہٕ وُچھتھ تہٕ چھۅکہٕ لدن ہٕنٛز کرٮ۪کہٕ  بوٗزِتھ سٮ۪ٹھا دۅکھ زد۔

س2:۔  ہینری ڈونانٹن کیا اپیل کٔر پننہِ کِتابہِ منٛز لوٗکن؟

جواب:۔  پننہِ کتابہِ منٛز کٔر ہینری ڈونانٹن لوٗکن یہِ اپیل زِ جنٛگن دوران یِم سپاہ چھۅکہٕ آسن گژھان تِمن راحت واتناونہٕ خٲطرٕ گژھِ اکھ با ضٲ بطہٕ رضا کار تنظیم آسٕنۍ۔

س3:۔  عالمی ریڈ کرٛاس سوسایٹی کر آیہِ وجودس؟

جواب:۔  عالمی ریڈ کرٛاس سوسایٹی آیہِ 1863 عیسوی منٛز وجودس۔

س 4:۔  عالمی ریڈ کرٛاس سوسایٹی ہُنٛد موٗلہٕ مقصد کیا اوس؟

جواب:۔  عالمی ریڈ کرٛاس سوسایٹی ہُنٛد موٗلہٕ مقصد اوس جنگن منٛز سپدن واجِنہِ تبٲہی ہُنٛد مُقابلہٕ کرنہٕ علاوٕ وُجار گٲمِتٮ۪ن لوٗکن ہٕنٛزِ نوِ سرٕ بجٲیی تہٕ بحٲلی خٲطرٕ کٲم کرٕنۍ۔

س5:۔  وۅنی کمہٕ کمہٕ کامہِ چھےٚ یہِ تنظیم کران؟

جواب:۔  وۅنۍ چھےٚ یہِ تنظیم مُحتاجن۔ غریبن ۔ تہٕ جِسمس منٛز کانہہ نۅقُص آسن والٮ۪ن لوٗکن تہِ مدد کران تہٕ امہِ علاوٕ چھےٚ قۅدرتی آفژن منٛز وُجارٕ گژھن واٮ۪ن لوٗکن تہِ مدد کران۔

س6:۔  ہنٛدوٗستانس منٛز کر آیہِ ریڈ کرٛاس سوسایٹی قایم کرنہٕ؟

جواب:۔  ہندوٗستانس منٛز آیہِ ریڈ کرٛاس سوسایٹی 1920 عیسوی یس منٛز قٲیِم کرنہٕ۔

س7:۔  سٲنِس ریاستس منٛز کر آیہِ ریڈ کرٛاس سوسایٹی وجوٗدس؟

جواب:۔  سٲنِس ریاستس منٛز آیہِ ریڈکرٛاس سوسایٹی 1947 عیسوی یس منٛز وجوٗدس۔

س8:۔ ریڈ کرٛاس سوسایٹی ہٕندۍ بُنیادی اصوٗل لیِکھِو۔

جواب:۔  ریڈ کرٛاس سوسایٹی ہٕنٛدۍ بُنیٲدی اصوٗل چھِ ۔ اِنسٲنی قدرن رٲچھ کرٕنۍ ۔ عالمی سوٚتھرس پٮ۪ٹھ تمام لوٗکن منٛز بٲے بنٛدُت پٲدٕ کرُن ۔ اِنسانہٕ سٕنٛدِس زُو وس تہٕ صٮ۪حتس بچاو تہٕ عزت کرُن ۔ اِنسانن ہٕنٛدۍ دۅکھ کم کرٕنۍ ۔ مذہب کِس ، زٲژ ہٕنٛدِس تہٕ سِیاست کِس ناوس پٮ۪ٹھ اِنسانن درمیان بٮ۪ن نہ ورتاوُن تہٕ پرٛٮ۪تھ انمانہٕ غٲر جٲنِب دٲری ورتاوٕنۍ۔

س9:۔  سٲنِس ریاستس منٛز کمہٕ کمہٕ خاص کامہِ چھےٚ از تام ریڈکرٛاس سوسایٹۍ کرِمٕژ؟

جواب:۔  سٲنِس ریاستس منٛز چھےٚ ریڈ کرٛاس سوسایٹی از تام تھیکٕنۍ لایق کٲم کٔرمٕژ ۔ 1942 عیسوی منٛز کوٚر امہِ تنظیمہِ جنگہٕ سٍتۍ تباہ گٲمِتٮ۪ن لوٗکن مدد ۔ ژارِ شریفہ کِس نارٕ وٲرۍ داتس تہٕ ٹنلہِ پٮ۪ٹھ پسہِ ؤسِتھ یینہٕ کِس حٲدۍثس منٛز تباہ گٲمِتٮ۪ن لوٗکن تہِ کوٚرُن مدد۔ والٹینٛگ نارڈس منٛز شینہٕ طوفانس منٛز مرن والٮ۪ن تہٕ وُجارٕ گٲمِتٮ۪ن لوٗکن تہِ کوٚرُن مدد ۔ بُنلِس منٛز تباہ گٲمتٮ۪ن گامن تہٕ لوٗکن کوٚرُن مدد۔

3۔  ہیڈماسٹر صٲبنہِ ناوٕ لیکھِو درخاس یتھ منٛز سکوٗلس منٛز بچن ہٕنٛز اکھ ریڈ کرٛاس کمیٹی قٲیِم کرنُک اِجازت منٛگنہٕ یِیہِ۔ 

 

جواب:۔ 

       بخِدمت جناب ہیڈ ماسٹر صٲب

  سرکٲرۍ مِڈل سکوٗل کٔٹۍ پوٗر کنڈ

 

         مضمٗون : سکوٗلس منٛز بچن ہٕنٛز اکھ ریڈ کرٛاس کمیٹی قٲیِم کرنُک درخاس۔

                      جناب عٲلی

                       عرض چھُ یہِ زِ سکوٗلس منٛز چھِ اکژ اکہِ رنگہٕ یا بییہِ رنگہٕ لوٚکٕٹۍ یا بٔڈۍ حٲدثہٕ گژھان ۔ حٲدۍ ثن منٛز زخمی گژھن والٮ۪ن شُرٮ۪ن گوٚڈنیُک مدد کرنہٕ خٲطرٕچھِ أسۍ  بچن ہٕنٛز اکھ ریڈکرٛاس تنظیم قٲیِم یژھان کرٕنۍ ۔ یتھ منٛز توٚہنٛدِ اِجازتُک تہٕ مددٕ تُک سٮ۪ٹھا ضروٗرت چھُ ۔ اسہِ چھےٚ ووٚمید زِ توہہِ کرِو اسہِ یہِ تنظیم بناونس منٛز پوٗرٕ مدد۔ شُکریہ۔

  تُوہٕندۍ وفادار تہٕ تابیہ دار طٲلبِ عٔلِم

4۔ ۔  خٲلی جایہِ بٔرِو۔

 

دود                   دٲدۍ                   دادٮ۪ن                 بُنیُل                   بُنِلۍ              بُنِلٮ۪ن

بوے             بٲے                باین

مول              مٲلۍ             مالٮ۪ن

کوٚل           کٔلۍ         کلٮ۪ن

گوٚل           گٔلۍ            گلٮ۪ن

زوٚر            زٔرۍ             زرٮ۪ن

5۔  خٲلی جایہِ بٔرِو۔ 

1۔  فروری 2005 مٕنٛز آو  والٹینگ قٲضۍ گُنڈس منٛز شینہٕ طوفان۔

2۔ اکتوبر 2005 مٕنٛز آو شمٲلی کشیٖرِ منٛز ووکھٕ  بُنیُل۔

3. عالمی ریٚڈ کرٛاس سوسایٹی ہُنٛد دفتر چھُ سُویزر لینٛڈ کِس شہر  جنیواہس منٛز۔

4.  شرٕہن گٲنٛٹن دوران گٔیہِ  ژتجی ساس  سِپاہ چھۅکہٕ لد تہٕ مارٕ۔

5.  اِسانس پزِ أکِس بییِس  اکار بکار  یُن۔

6۔  نۅمن عنوانن مُتعلِق لیٖکھِو داہ داہ جُملہٕ۔

1۔ ریٚڈ کرٛاس سوسایٹی ہٕنٛز کٲم

2۔ میون دوس

1۔ ریٚڈ کرٛاس سوسایٹی ہٕنٛز کٲم 

            ریڈ کراس سوسایٹی چھےٚ اکھ رضا کار تنظیم۔ یہِ تنظیم آیہِ 1863 عیسوی یس مٕنٛز بناونہٕ ۔ امہِ تنظیمہِ ہُنٛد دفتر چھُ سویزر لینڈ کِس شہر جنیوا ہس منٛز ۔ امہِ تنظیمہِ ہٕنٛز کٲم ٲس جنٛگن منٛز سپدن واجِنہِ تبٲہی ہُنٛد مُقابلہٕ کرنہٕ علاوٕ وُجار گٲمِتٮ۪ن لوٗکن ہٕنٛز نوِ سرٕ بحٲلی خٲطرٕ اِنتظام کرُن۔ امہِ علاوٕ چھےٚ یہِ تنظیم محتاجن ۔ غریبن ۔ تہٕ جِسمس کانہہ نۅقُص آسن والٮ۪ن لوٗکن تہِ مدد کران ۔ بُنۍلٮ۪ن ۔ سہلابن ۔ نارٕ وٲرۍ داتن ۔ طوفانن تہٕ باقٕے مُصیبتن منٛز ہینہٕ ٮوالٮ۪ن لوٗکن ہٕنٛز بحٲلی تہٕ بجٲیی باپتھ چھےٚ یہِ تنظیم پرٛٮ۪تھ ساتہٕ تیار روزان۔ تہٕ تِمن اِمداد واتہٕ ناوان ۔ اسہِ تہِ پزِ پانہٕ وۅژھِ تہٕ وٲنٛجہِ سان اتھ تنظیٖمہِ مدد کرُن۔

2۔ میون دوس 

          دوس گو سُے یُس وقتس پٮ۪ٹھ بکار ییِہ۔ مےٚ چھِ واریا دوس مگر ۔۔۔۔۔ چھُ میون خاص دوس ۔ تٔمۍ سٕنٛدۍ خاص صِفت چھِ تٔمِس میون خاص دوس بناون۔ سہُ چھُ رٕتہِ تہٕ شریف خاندانُک۔ سہُ چھُ صبٕحس سُلِی وتھن ۔ نماز پٔرِتھ مٲلِس ماجہِ سلام کرن ۔ سُہ چھُ وقتس پٮ۪ٹھ سکوٗل یِون ۔ تٔمِس چھےٚ صفٲیی وارا پسنٛد  ۔ سُہ چھُ سکوٗلس منٛز پرنہٕ لیٖکھنہٕ علاوٕ باقی شُرٮ۪ن تہِ مدد کرن۔ یِمو رٕتیو عادتو کِنۍ چھُ سُہ سارِنے شُرٮ۪ن تہٕ وۅستادن پسنٛد۔ أسۍ چھِ أکۍ سٕے جمٲژ منٛز پرن تہٕ کلاسس منٛز چھِ لرِ لوٚر آسان۔ لیکھن ، پرن ۔ گِندن یِکہٕ وٹہٕ ۔ میون دوس چھُ مےٚ واریا ٹوٹھ۔ 

 

﴿ تمام دوستن رفیقن تہٕ شفیقن چھےٚ میٲنۍ گُذٲرش زِ تِم کرن تمام اُمتِ مُسلہِ میٖنس سٍتۍ میانٮ۪ن والدینن خٲطرٕ تہِ دُعایہِ مغفٕرت ۔ شُکریہ﴾