ریٛیہِ | سبق نمبر 10 | کٲشُر | ٲٹھمہِ جمٲژ خٲطرٕ | سوال تہٕ جواب

  

  ٲٹھمہِ جمٲژ خٲطرٕ  -   سوال تہٕ جواب

سبق نمبر 10 :   ریٛیہِ

مشق:

1۔ لفٕظ تہٕ معنی

لفٕظ                       معنی

بُبراے    :       آبہٕ بُبرَن ہٕنٛدۍ پٲٹھۍ کُنہِ چیزُک أکی ساتہٕ یسلہٕ پٲٹھۍ کھسُن

دِوَے       :      مٲلہٕ ، وۅرس ۔ وۅسہٕ درٛۅسہٕ

عروج   :       اِرتقا ٕ پرٛاوُن ۔ تھوٚد کھسُن

کاڈ         :   زیٹھٕ راوُن ۔ واش کڈُن

درٛمُن کوٚٹ :    درٛمُن چھُ اکھ وُسنۍ گاسہٕ ذاتھ ۔ کوٚٹ گۅو  درٛمنس درٛامُت تھَو۔

2۔ جواب لیِکِھو

س1:۔   ریٚیَن کر لٔج بُبراے؟

جواب:۔  سونٛتہٕ روٗدٕ ییٚلہِ پوٚتھُر نرمیٛو تہٕ ریٚین لٔج بُبراے۔

س2:۔ بجہِ ریٛیہِ کیا آسہٕ کران؟

جواب:۔ بجہِ ریٛیہِ آسہٕ گوٚبۍ گوٚبۍ پٍرۍ ترٛٲوِتھ ۔ ٹھہراو کٔرۍ کٔرۍ وُڈنہِ سنٛبلان تہٕ منٛزۍ منٛزۍ کاڈ کڈان۔

س3:۔  بِلۍ بِچُر کیازِ اوس ولسنس آمُت؟

جواب:۔بِلۍ بِچُر اوس وۅپھِ وۅپھِ شِکار کٔرِتھ وولسنس آمُت۔

س 4:۔  نِچہِ ریٛیہِ کیا آسہٕ ہن سوچان؟

جواب:۔ نِچہِ نِچہِ ریٛیہِ آسہٕ زن تہِ دایہِ ۔یمہٕ ریٛیہِ آسہٕ ہن بجن ریین ہٕنٛدِس عروٗجس پٮ۪ٹھ رٔشِک کران۔

3. " ریٛیہِ " افسانس منٛز چھِ ترٛییہِ قٕسمٕکۍ کِردار:

1. بجہِ ریٛیہِ         2. نِچہِ ریٛیہِ            3.  بِلۍ بِچُر

ترینہٕ ؤنۍ قٕسمن ہٕنٛدٮ۪ن کِردارن ہٕنٛز کٲم ژیتَس پٲوِتھ لیٖکھو افسانٕچ کتھ پنہٕ نٮ۪ن لفظن منٛز۔

 جواب:۔ " رییِہ "  چھُ اختر محی الدین سُنٛد لیٖوٗکھمُت اکھ مۅخصر افسانہٕ ۔ اتھ افسانس منٛز چھِ ترٛے کِردار ۔ بجہِ رییِہ ۔ نِچہِ رییِہ تہٕ بِلۍ بِچُر ۔ بجہِ رییِہ چھےٚ ویچھِ ۔ تِم چھےٚ سفید پکھہٕ کٔرِتھ کوٚت تام سٲلس درامٕژ ۔ تِم چھےٚ گوٚبۍ گوٚبۍ پٍرۍ ترٛٲوِتھ ۔ ٹھہراو  کٔرۍ کٔرۍ  وُڈنہِ سنٛبالان تہٕ مٔنٛزۍ مٔنٛزۍ کاڈ کڈان ۔ زن چھےٚ پنٕنہِ آسٕنُک جٮ۪شنہٕ مناوان۔ نِچہِ رییِہ چھےٚ بِسیار ۔ یِم چھےٚ زن تہٕ دایہِ تہٕ بجٮ۪ن ریین أنٛدۍ أنٛدۍ گتہٕ گیوٗر کران۔ بِلۍ بِچُر چھُ لنٛجہِ پٮ۪ٹھ بۅچھِ ہۅت ۔ شِکار کرنس چھُ وولسنس آمُت۔ پننہٕ نِس شِکارس پرٛاران۔

4۔  یہِ افسانہٕ پٔرِتھ لیٖکھو امیُک مرکزی خیال

              " رییہِ " افسانُک مرکٔزی خیال چھُ یہِ زِ اِنسانن تہٕ باقٕے زو زٲژن پزِ پنہٕ نِس حدس منٛز روزُن ۔ رییہِ ہُنٛد طاقتھ چھُ نہٕ اسمان کھسُن ۔ یامتھ سۅ وُپھ تُلان چھےٚ بِلۍ بِچُر چھُس نٮ۪نٛگلاوان ۔ تہٕ ییٖتِس کالس زمیٖنس پٮ۪ٹھ  تہٕ ٲلِس منٛز  روزان چھےٚ تیٖتِس کالس چھےٚ محفوظ روزان۔

5۔  افسانہٕ کیا گوٚو۔

              افسانہٕ گو سۅ کتھ یا دلیل یتھ منٛز اکھ مخصوٗص واقہٕ ووننہٕ آسہِ آمُت۔ یہِ چھُ کٲنٛسہِ خاص افسانہٕ نِگار سُنٛد تخلیق آسان ۔ ژھۅچر چھُ افسانہٕ خٲطرٕ ضروٗری ۔ اَمِکۍ واقہٕ تہٕ پلاٹ گژھن نہٕ وُٹھِتھ آسٕنۍ۔

 

6۔   اختر  محی الدینس متعلق لیٖکھِو پانٛژھ جُملہٕ 

1۔ اختر محی الدین ٲسۍ اکھ افسانہٕ نِگار ، ناول نِگار ، تہٕ تحقیق کار ۔

2۔ تِم ٲسۍ لعل بازار سری نگر روزان۔

3. تِمو چھُ کٔشیٖرِ ہٕنٛدس توٲریٖخس متعلِق اہم مقالہٕ لیٖکھۍ مٕتۍ۔

4. اختر محی الدین ٲسۍ ترجُمہٕ کار تہِ۔

5. تِم گٔےٚ 22 مٔی 2001 عیسوی یس منٛز ییمہِ عالمہٕ۔