مانٛچھ تُلٕر ۔ سبق نمبر 13 ۔ کٲشُر ٲٹھِم ۔ سوال تہٕ جواب

 

ٲٹھمہِ جمٲژ خٲطرٕ سوال تہٕ جواب

سبق نمبر 13: مانچھ تُلٕر

                        حیاتیات چھےٚ فطری ساینسٕچ سۅ لٔنٛڈ یۅسہٕ زو  زٲژن ہُنٛد زیوُن ، نَوُن ، پرٛٮ۪تھُن تہٕ پوٹھُن ویژھناوان چھےٚ۔ فاروق بُخٲری سُنٛد یہِ مضموٗن چھُ خٲلِص ساینسی۔ اتھ منٛز چھُ مانٛچھ تُلرٮ۪ن ہُنٛد زیوُن ، پرٛتھُن ، پوٹھُن تہٕ یہندٕ زندگی ہُنٛد دور بیان کرنہٕ آمُت۔

2. جواب لیٖکھو:

سوال 1۔ لٮ۪نٛگسٹراٹھ ہایِو کِتھٕ کٔنۍ چھُ یوان بناونہٕ؟

جواب: لٮ۪نٛگسٹراٹھ ہایو چھُ فرٕ ہچہِ وٮ۪ن چوکاٹن پٮ۪ٹھ بناونہٕ یوان۔ أکِس ہایوس منٛز  چھِ ٲٹھ چوکاٹ آسان یِمن درمیان اکھ خاص جاے تھاونہٕ یوان چھےٚ۔

سوال2۔ رٲنۍ چھا گنٕچ راے کِنہٕ موج؟

جواب: رٲنۍ چھےٚ گنٕچ موج آسان۔

سوال3۔ مانٛچھ تُلرٮ۪ن کُس چھُ مول؟

جواب: بہوال تُلرِ چھِ مانٛچھ تُلرٮ۪ن ہٕنٛدۍ مٲلۍ آسان۔

سوال4۔ کار کُن تُلرِ کمہِ وٲنٛسہِ پٮ۪ٹھٕ چھےٚ ہٮ۪وان وِیوٗر سومبراوُن؟

جواب: کارکُن تُلرِ چھےٚ 21 دۅہہٕ پٮ۪ٹھہٕ مرنس تام وِیوٗر سومبراوُن ہٮ۪وان۔

سوال 5۔ کارکُن تُلرِ کمہٕ کامہِ چھےٚ کران؟

جواب: کار کُن تُلرِ چھےٚ سٮ۪لہٕ صاف کران ، لاروہن کھٮ۪ن دِوان ، ہایِوٕچ صفٲیی کران ، موم ترٛاوان ، فر بناوان ، مانٛچھٕ منٛز ہُریمانہٕ آب ہوٚکھناوان ، گنٕچ رٲچھ کران ، گن ہوا دار بناوان ، یوٗر ، نٮ۪کٹر ، آب تہٕ تُلرِ مایہِ انان کٲم کران۔

سوال 6. بیہوال تُلرِ کیازِ چھےٚ باضے گنہٕ منٛز کٔڈِتھ یوان ژھنٛنہٕ؟

جواب: گنس منٛز خۅراکٕچ کمی گژھنہٕ کِس صوٗرتس منٛز چھےٚ بیہوال تُلرِ باضے گنہٕ منٛز کٔڈِتھ یوان ژھنٛننہٕ۔

سوال 7۔ ماچھ تُلرٮ۪ین ہُنٛد کیا فٲیدٕ چھُ اِنسانس؟

جواب: مانٛچھ تُلرِ چھےٚ مانٛچھ تیار کران۔ مانٛچٛھ چھُ اِنسانس وارِیاہن بٮ۪مارٮ۪ن علاج کرنس منٛز فٲیدٕ دِوان۔

3. خٲلی جایہِ بٔرِو:

1۔ اکہِ پٮ۪ٹھ ترٛٮ۪ن دۅہن تام چہِ وٲنٛسہِ ہٕنٛز تُلرِ چھےٚ خانن ہٕنٛز صفٲیی کران۔

2۔ ترٛیےٚ پٮ۪ٹھ شے دۅہ تام چہِ وٲنٛسہِ ہٕنٛزِ تُلرِ چھےٚ زِٹھۍ لاروا رچھان۔

3۔ شےٚ پٮ۪ٹھ داہ دۅہ تام چہِ وٲنٛسہِ ہٕنٛزِ تُلرِ چھےٚ لۅکٕٹۍ لاروا رچھان۔

4۔ ٲٹھِ پٮ۪ٹھٕ باہن دۅہن تام چہِ وٲنٛسہِ ہٕنٛزِ تُلرِ چھےٚ رٲنۍ کھیٛاوان چاوان۔

5۔ کہہ پٮ۪ٹھٕ ارداہ دۅہ تام چہِ وٲنٛسہِ ہٕنٛز تُلرِ چھےٚ ہایوُ صاف کران۔

6. ارداہ پٮ۪ٹھٕ وُہ دۅہ تام چہِ وٲنٛسہِ ہٕنٛز تُلرِ چھےٚ ہایوٕچ رٲچھ راوٹھ کران۔

4. بۅنہٕ کنہِ دِنہٕ آمژن تُلرٮ۪ن مُتعلق لیٛکھِوژور ژور جُملہٕ:

1. کارکُن تُلٕر: کارکُن تُلرِ چھےٚ کامہِ تُلرِ آسان۔ یم چھےٚ بے پھل آسان۔ گنہٕ چہِ ساریے کامہِ چھےٚ یمےَ أنٛزراوان۔ یِم چھِ  ٹۅپھ دِوان۔

2۔ رٲنۍ: رٲنۍ چھےٚ کالونی ہٕنٛز موج آسان۔ یہِ چھےٚ ٹھوٗل ترٛوان۔ یہِ چھےٚ باقی تُلرٮ۪و کھوتہٕ بٔڈ آسان۔ رٲنۍ چھےٚ نہٕ ٹۅپھ دِوان۔

3. بٮ۪ہوال تُلرِ: یِم تُلرِ چھِ نر آسان۔ یِم چھِ ژھوٚٹۍ آسان۔ یِم چھِ نہٕ کانہہ کٲم کران۔ یِم چھِ تمام تُلرٮ۪ن ہٕنٛدۍ مٲلۍ آسان۔

5. وٲحِد ناوتِس مُقابلہٕ لیٛکھِو جمع ناوُت:

تُلٕر  =  تُلرِ   ،    کانگٕر = کانگرِ   ،   پٔتر  =  پٔترِ    ،   گۅگٕج  =  گۅگجہِ    ،   زِتِنۍ  =  زِتِنہِ    ،    لیٚج  =  لیٚجہِ    ،    ژٔر  =  ژرِ    ،    گٔر  =  گرِ    ،    نٔر  =  نرِ    ،    أنۍ  =  انہِ     ،     لٔٹ  =  لچہِ

ال = الہٕ    ،    ٹھوٚل = ٹھوٚلہٕ     ،      دٔلیل =  دلیٖلہٕ      ،      ژادر  =  ژادرٕ     ،      دۅس  =  دۅسہٕ       ،       پھٛیژ  =  پھیٚژٕ      ،      کینٛز  =  کینٛزٕ         ،        ٹۅپھ  =  ٹۅپھٕ

گُر  =  گُرۍ    ،      زُر  =  زُرۍ       ،       زوٚر  = زٔرۍ          ،         ٹونٛگُر  =  ٹونٛگٕرۍ        وۅدُر  =  وۅدٕرۍ       ،       بٮ۪گُر  =  بٮ۪گٕرۍ

نوٚٹ =  نٔٹۍ        ،        ہوٚٹ  =  ۂٹۍ         ،        موٚت  =  مٔتۍ         ،       پوٚژھ  =  پٔژھۍ        ،         کیوٚم  =  کیمۍ        ،         کھونٛد  =  کھٔنٛدۍ          ،        پوٚد  =  پٔدۍ

6. کراوُت کیا گۅو؟ یہِ کٔژن کالن منٛز چھُ اِستعمال یون کرنہٕ؟

کراوُت گۅو کٲم مِثالے بتہٕ کھٮ۪ون ، پرُن، لیکھُن۔ کال گۅو وقت یا زمانہٕ۔ کالس ترٛے قٕسٕم۔ 1۔پتھ کال ، 2۔ از کال ، 3۔ یِنہٕ وول کال۔

1۔ پتھ کال:۔ یس کٲم گُذریمِتِس وقتس منٛز پتھ گٲمِتِس وقتس منٛز کرنہٕ یِیہِ تتھ کالس چھِ پتھ کال ونان۔ مِثالے۔ سہُ اوس راتھ میوٗن گرٕ آمُت۔ اوترٕ وُچھ مےٚ پنُن دوس تہٕ بہٕ گوس واراہ خۅش۔

2۔ از کال:۔ یس کٲم وُنۍ کٮ۪نہٕ سٕے سپدان آسہِ تتھ چھِ از کال ونان۔ مِثالے؛ شُرۍ چھِ سبق پران۔ نٮ۪برٕ چھُ روٗد پٮ۪وان۔

3۔ ینہٕ وول کال:۔ یس کٲم یِنہٕ وٲلِس ٮ۪قتس منٛز کرنہٕ ییہِ تتھ چھِ  ییِنہٕ وول کال ونان۔ مِثالے؛ پگاہ آسہِ تاپھ۔ سونتہٕ کٲلۍ پھۅلن پوش۔

7. یِم ناوٕتۍ کٔریوٗکھ جُملن منٛز اِستعمال یُتھ یہِ ننہِ زِ یِم چھا نر صوٗرتس منٛز اِستعمال سپدان کِنہٕ مادٕ صوٗرتس منٛز:

تُلر: تُلٕرچھےٚ اسہِ مانٛچھ دِوان۔ ﴿مادٕ صوٗرت﴾

کار کُن: یہِ کمہِ پارٹی ہُنٛد کار کُن چھُ۔ ﴿نر صوٗرت﴾

ٹھوٗل: ٹھوٗل چھُ سفید آسان۔

آگُر: مانٛچھُک آگُر چھُ تُلٕر آسان۔

مانٛچھ: مانٛچھ چھُ واریہن بٮ۪مارٮ۪ن علاج۔

گرمی: از چھےٚ واریاہ گرمی۔

گن: سٲنِس گامس منٛز چھُ مانٛچھ گن۔